ROUZE PE MUSTAFA KE UDAASI SI CHHAAI HAI
KUNBE KO KHOKE ZAINABE NAASHAAD AAI HAI
ROKE PUKAARI NAANAA MAI FARIYAAD LAAI HUN
MAI CHHOR KAR HUSAIN KO JANGAL ME AAI HUN
NAANAA HAMAARE GHAR KAA SAB ASBAAB LUTGAYAA
NAANAA HAMAARE SAR PE NA BAAQI RAHI RIDAA
NAANAA HAZAAR TARHA JAFAA KI LAEENON NE
KHAIMON ME HAAE AAG LAGAADI LAEENON NE
NAANAA AJEEB SAANEHA HAM PAR GUZAR GAYE
RANJO ALAM NE GHER LIYAA HAM JIDHAR GAYE
NAANAA KHUDAA KE GHAR ME NA HAM KO AMAAN MILI
BHAAI NE SHEHR CHHOR KE JANGAL KI RAAH LI
NAANAA SHAHEED HOGAYE BHAAI KE JAANISAAR
EK EK KARKE MARGAYE ASHAABE ZIWIQAAR
NAANAA BALAA KE BAN ME QAYAAMAT KAA RAN PARAA
*****
NAANAA TUMHAARE SHAKL KAA FARZAND EK JO THAA
KHAA KE SINAA JIGAR PE WO MEHRU BHI CHALBASA
NAANAA SHAQI KE TEER SE ASGHAR HUWAA SHAHEED
AISAA HUWAA NA HOGAA JAHAAN ME SITAM SHADEED
NAANAA ZAMEENE KARBOBALAA LAAL HOGAYI
QAASIM KI LAASH GORON SE PAAMAAL HOGAYI
NAANAA KATAA KE SHAANON KO ABBAS MARGAYE
GHURBAT ME BHAAIJAAN KO BE AAS KARGAYE
NAANAA HUWI ASEER TUMHAARI NAWAASIYAAN
KAUNO MAKAAN ME CHHAA GAYI GHAM KI UDAASIYAAN
NAANAA HARAM HUSAIN KE BAAZAAR ME GAYE
HAM SAR BAREHNAA KUFE KE DARBAAR ME GAYE
NAANAA TUMHAARI AAL GAYI LUTKE SHAAM ME
POHNCHI ALI KI BETIYAAN DARBAARE AAM ME
NAANAA HAQEER SAAHEBE TATHEER HOGAYE
HAM LOG SHEHRE SHAAM ME TASH-HEER HOGAYE
NAANAA ASEER BAARAA THE AUR EK THI RASAN
BAANDHE GAYE THE MISLE GUNAAHGAARO KHASTATAN
NAANAA HAM APNE HAAL PE ROTE THE HAALE ZAAR
NAANAA HAMAARE HAAL PE HASTE THE BADSHUHAAR
EK EK KAA NAAM PUCHHTAA THAA BAANIE SITAM
NAANAA BATAATAA JAATAA THAA SHIMRE JAFAA SHISHAM
YE ZAINABE HAZEEN HAI YE KULSOOME DIL FIGHAAR
UNGLI UTHAA UTHAA KE DIKHAATAA THAA NAABEKAAR
NAANAA AJEEB HAAL HAMAARAA THAA US GARI
EK BIBI PICHHE DUSRI BIBI KE CHHUPTI THI
EK THAR THARI SI MERE TAN ME PAR GAYI
SAD HAIF HAI ZAMEEN ME ZAINAB NA GAR GAYI
ITNE ME EK SHAAMI NE NAANAA GHAZAB KIYAA
SAIDAANI KO KANEEZI ME USNE TALAB KIYAA
HOTI THI LAAKH ZILLATEN HAM DEKHTE RAHEN
HANS HANS KE TAAZIYAANE SITAM JHELTE RAHEN
NAANAA TABAAH HOKE HAM AAYE HAIN SHAAM SE
EK DAAGHE NAU SAKINAA KAA LAAYE HAIN SHAAM SE
AB TAK HAIN NEEL RASSI KE SHAANON KO DEKH LO
NAANAA HAMAARE TAN PE NISHAAANON KO DEKH LO
ZAINAB JO ROKE KARTI THI QABRE NABI PE BAIN
THARRAA RAHAA THAA ROUZAE SULTAANE MASHRAQAIN
BAS KHATM KAR NASHAAR YE GHAMNAAK DAASTAAN
ROE HAIN IS ALAM ME ZAMEEN AUR AASMAAN
